எரிச்சலூட்டும் குடல் நோய்க்குறி (ஐபிஎஸ்) என்பது நமது செரிமான அமைப்பைப் பாதிக்கும் அறிகுறிகள் ஆகும். இது மக்களிடையே பரவலாகக் காணப்படும் ஒரு இரைப்பை-குடல் நோய், இது சுமார் 15% மக்களை பாதிக்கிறது என்று நிபுணர்கள் மதிப்பிடுகின்றனர்.

ஐபிஎஸ் வகைகள்

ஐபிஎஸ் உள்ள பெரும்பாலான மக்களுக்கு சில நாட்கள் குடல் இயக்கம் சாதாரணமாக இருக்கும், வேறு சில நாட்கள் அசாதாரணமாக இருக்கும். அந்த அசாதாரண இயக்கத்தை வைத்துத் தான் ஐபிஎஸ்-இன் வகை வரையறுக்கப்படுகிறது.

• மலச்சிக்கலுடன் கூடியது (ஐபிஎஸ்–சி): மலம் கடினமானவும் கெட்டியாகவும் இருக்கும்
• வயிற்றுப்போக்குடன் கூடியது (ஐபிஎஸ்–டி): மலம் தளர்வாகவும் நீர்த்தும் இருக்கும்
• இரண்டும் சேர்ந்தது (ஐபிஎஸ்–எம்): சில சமயம் மலம் கடினமானவும் கெட்டியாகவும் இருக்கிறது, சில சமயம் மலம் தளர்வாகவும் நீர்த்தும் இருக்கும்

ஐபிஎஸ் அறிகுறிகள்

ஐபிஎஸ்-இன் அறிகுறிகள் பின்வருமாறு:

• வயிற்று வலி அல்லது பிடிப்புகள்
• அதிகப்படியான வாயு மற்றும் வயிற்று உப்புசம்
• வயிற்றுப்போக்கு, மலச்சிக்கல் அல்லது இரண்டும் மாறி மாறி வருவது
• மலத்தில் சளி
• மலம் கழித்த பின்னரும் இன்னும் கழிக்க வேண்டும் போன்ற உணர்வு

ஐபிஎஸ் எதனால் ஏற்படுகிறது

இதற்கான சரியான காரணம் அறியப்படவில்லை, ஆனால் இது ஒரு நரம்பு-இரைப்பைக்குடல் (GI) கோளாறு என்று கருதப்படுகிறது. அதாவது செரிமான அமைப்பு நன்றாகச் செயல்பட குடலும் மூளையும் ஒருங்கிணைந்து இயங்க வேண்டும், அதில் சிக்கல் ஏற்படுவது ஐபிஎஸ்-க்கான காரணம் என்று கருதப்படுகிறது.

இரைப்பைக்குடல் பாதையில் ஏற்படும் பாக்டீரியா மாற்றங்கள், கடுமையான தொற்று, சில உணவுகளுக்கான ஒவ்வாமை, குழந்தை பருவத்தில் ஏற்பட்ட கடுமையான உடல், பாலியல் மற்றும் உணர்ச்சி துஷ்பிரயோகம் தொடர்பான அழுத்தங்கள் போன்றவை ஐபிஎஸ்-க்கான பிற சாத்தியமான காரணங்கள் ஆகும்.

ஐபிஎஸ் தூண்டுதல்கள்

ஐபிஎஸ் அறிகுறிகளை ஏற்படுத்தும் அல்லது மோசமாக்கும் பொதுவான தூண்டுதல்கள் பின்வருமாறு:

• மாதவிடாய்
• சில வகை உணவுகள்
• மன அழுத்தம்

ஐபிஎஸ் நோய்கண்டறிதல் மற்றும் அதற்கான சோதனைகள்

ஐபிஎஸ்-ஐக் கண்டறிவதற்கான முதல் படி விரிவான மருத்துவ வரலாறு ஆகும். உங்கள் மருத்துவர் உங்கள் அறிகுறிகளைப் பற்றி கேட்பார், மேலும் அதன் அடிப்படையில் உங்களுக்கு பிற சோதனைகள் செய்யப்படலாம். சோதனைகள் உங்கள் ஐபிஎஸ்-ஐ கண்டறிவதற்காக அல்ல, வேறு நிலைமைகளை கண்டறிந்து அவற்றை விலக்குவதற்காக அவை செய்யப்படுகின்றன.

உங்களுக்கு அறிகுறிகளை ஏற்படுத்தக்கூடிய தொற்று, சில உணவுகளுக்கான ஒவ்வாமை அல்லது வேறு செரிமானப் பிரச்சினைகள் போன்றவற்றைக் கண்டறிந்து விலக்குவதற்காக இரத்தப் பரிசோதனை, மலப் பரிசோதனை மற்றும் ஹைட்ரஜன் சுவாசப் பரிசோதனை போன்ற ஆய்வக சோதனைகள் செய்ய வேண்டியிருக்கலாம்.

உங்கள் இரைப்பைக்குடல் பாதையில் வீக்கம் அல்லது அசாதாரண வளர்ச்சிகள் சம்பந்தப்பட்ட நிலைமைகளை கண்டறிந்து விலக்குவதற்காக கொலோனோஸ்கோப்பி, சிக்மாய்டோஸ்கோப்பி, அப்பர் எண்டோஸ்கோப்பி போன்ற இமேஜிங் நடைமுறைகள் செய்ய தேவைப்படலாம்.

ஐபிஎஸ் சிகிச்சைமுறை மற்றும் மேலாண்மை

குறிப்பிட்ட சிகிச்சைமுறை என்று எதுவும் இல்லை. உங்கள் உணவுப் பழக்கம் மற்றும் தினசரி செயல்பாட்டு வழக்கம் ஆகியவற்றில் சில மாறுதல்களைச் செய்வது உதவிகரமாக இருக்கும். மேலும் மருந்துகள் மற்றும் நடத்தை-மற்றும்-உளவியல் சார்ந்த சிகிச்சை ஆகியவை உதவக்கூடும்.

• உணவில் நார்ச்சத்தை அதிகரிக்கவும். மலச்சிக்கலால் நீங்கள் சிரமப்படுகிறீர்கள் என்றால் பழங்கள், காய்கறிகள், தானியங்கள், கொடிமுந்திரி மற்றும் கொட்டைகள் போன்ற நார்ச்சத்து நிறைந்த உணவுகளை சாப்பிடவும்
• பால்-சார்ந்த பொருட்களைக் குறைக்கலாம். ஐபிஎஸ் உள்ளவர்களிடையே லாக்டோஸ்-ஒவ்வாமை அதிகமாகக் காணப்படுகிறது. அதனால் பால், சீஸ், தயிர் போன்றவற்றைக் குறைத்து, ப்ரோக்கோலி, கீரை அல்லது சால்மன் போன்ற கால்சியம் நிறைந்த உணவுகளை சாப்பிடுங்கள்.
• வாயுவை உண்டாக்கும் உணவுகளை குறைக்கவும். பீன்ஸ், பிரஸ்ஸல்ஸ் முளைகள் மற்றும் முட்டைக்கோஸ் போன்ற உணவுகள், கார்பனேற்றப்பட்ட சோடாக்கள் மற்றும் சூயிங் கம் ஆகியவற்றை குறைக்கவும்
• க்ளுட்டன் தவிர்க்கவும். க்ளுட்டன்-உள்ள உணவை தவிர்த்தால், அதில் பெரும்பாலும் காணப்படும் முக்கிய வைட்டமின்கள் மற்றும் தாதுக்கள் (நார்ச்சத்து, இரும்பு மற்றும் கால்சியம்) போன்றவற்றை வேறு விதங்களில் போதுமான அளவு பெறுவதை உறுதிசெய்து கொள்ளவும்.
• நிறைய தண்ணீர் குடிக்கவும். ஒரு நாளைக்கு குறைந்தது எட்டு கிளாஸ் தண்ணீர் (2 லிட்டர்) குடிக்கவும். தண்ணீர் உங்கள் இரைப்பைப் பாதையை உயவூட்டி மலச்சிக்கலை தடுக்க உதவும்.
• முறையாக உடற்பயிற்சி செய்யுங்கள். வாரத்திற்கு 150 நிமிடங்கள் மிதமான உடற்பயிற்சி செய்யுங்கள். அதாவது ஒரு நாளைக்கு சுமார் 30 நிமிடங்கள், வாரத்தில் ஐந்து நாட்கள்.
• மன அழுத்தத்தை குறைக்கவும். தினசரி யோகா, தியானம், உளவியல் சிகிச்சை போன்றவை நரம்பு மண்டலத்தை அமைதிப்படுத்தி, குடலைக் காக்க உதவும்.
• போதுமான தூக்கம் அவசியம். தினமும் இரவில் ஏழு முதல் ஒன்பது மணி நேரம் நல்ல தூக்கம் தேவை. மன அழுத்தத்தைக் குறைக்க இது மிகவும் சக்திவாய்ந்த முறையாகும்.
• நாட்குறிப்பு ஒன்றை வைத்திருங்கள். நீங்கள் எப்போது, என்ன சாப்பிடுகிறீர்கள், உங்கள் தினசரி செயல்பாடுகள் என்ன போன்றவற்றை அதில் தவறாமல் எழுதுங்கள். இந்த தகவலின் அடிப்படையில் எந்தெந்த உணவுகள் அல்லது செயல்பாடுகள் ஐபிஎஸ்-ஐ தூண்டுகின்றன என்பதைத் தீர்மானிக்க முடியும். உங்களுக்கான சிறந்த சிகிச்சையை வழங்க மருத்துவருக்கும் ஊட்டச்சத்து நிபுணருக்கும் இது உதவும்.
• உளவியல் சிகிச்சை. அறிவாற்றல் நடத்தை சிகிச்சை (CBT), ஹிப்னோதெரபி, பயோஃபீட்பேக் போன்ற சிகிச்சைகள் மன அழுத்தம் மற்றும் பதட்டம் மற்றும் மனச்சோர்வு போன்ற நிலைமைகளைக் கையாள உதவும்.
• மருந்துகள் – ஆண்டிடிரஸண்ட்ஸ், ஃபைபர் சப்ளிமெண்ட்ஸ் மற்றும் மலமிளக்கிகள், வயிற்றுப்போக்கு எதிர்ப்பு மருந்துகள், குடல் பிடிப்புகளுக்கு உதவும் மருந்துகள், புரோபயாடிக்குகள் ஆகியவற்றை மருத்துவர் பரிந்துரைக்கலாம்.

ஐபிஎஸ்-க்கென பிரத்தியேக சிகிச்சைமுறை எதுவும் இல்லை. பொதுவாக, தினசரி உண்ணும் உணவுகள் மற்றும் செயல்பாடுகளில் சில மாறுதல்கள் செய்வது காலப்போக்கில் உங்கள் நிலைமையை மேம்படுத்தும்.